جب دکھاتی ہے سحر عارض رنگيں اپنا
کھول ديتی ہے کلی سينۂ زريں اپنا
جلوہ آشام ہے صبح کے مے خانے ميں
زندگی اس کی ہے خورشيد کے پيمانے ميں
سامنے مہر کے دل چير کے رکھ ديتی ہے
کس قدر سينہ شگافی کے مزے ليتی ہے
مرے خورشيد! کبھی تو بھی اٹھا اپنی نقاب
بہر نظارہ تڑپتی ہے نگاہ بے تاب
تيرے جلوے کا نشيمن ہو مرے سينے ميں
عکس آباد ہو تيرا مرے آئينے ميں
زندگی ہو ترا نظارہ مرے دل کے ليے
روشنی ہو تری گہوارہ مرے دل کے ليے
ذرہ ذرہ ہو مرا پھر طرب اندوز حيات
ہو عياں جوہر انديشہ ميں پھر سوز حيات
اپنے خورشيد کا نظارہ کروں دور سے ميں
صفت غنچہ ہم آغوش رہوں نور سے ميں
جان مضطر کی حقيقت کو نماياں کر دوں
دل کے پوشيدہ خيالوں کو بھی عرياں کر دوں
---------------
Transliteration
Kali
Jab Dikhati Hai Sehar Ariz-e-Rangeen Apna
Khol Deti Hai Kali Seena-e-Zarren Apna
Jalwa Ashaam Haiye Subah Ke Mai Khane Mein
Zindagi Iss Ki Hai Khursheed Ke Pemane Mein
Samne Mehr Ke Dil Cheer Ke Rakh Deti Hai
Kis Qadar Seena Shagafi Ke Maze Leti Hai
Mere Khusheed! Kabhi Tu Bhi Utha Apni Naqab
Beher-e-Nazara Tarapti Hai Nigah-e-Betaab
Tere Jalwe Ka Nasheman Ho Mere Seene Mein
Aks Abad Ho Tera Mere Aaeene Mein
Zindagi Ho Tera Nazara Mere Dil Ke Liye
Roshni Ho Teri Gehwara Mere Dil Ke Liye
Zarra Zarra Ho Mera Phir Tarb Andoz-e-Hayat
Ho Ayan Johar-e-Andesha Mein Phir Souz-e-Hayat
Apne Khursheed Ka Nazara Karun Door Se Mein
Sifat-e-Guncha Hum Agosh Rahun Noor Se Mein
Jaan-e-Muztar Ki Haqiqat Ko Namayan Kar Doon
Dil Ke Poshida Khiyalon Ko Bhi Uryan Kar Doon